Jacobi Rohaulti Tractatus Physicus
Gallice emissus Et Recens Latinitate donatus,
per Th. Bonetum D.M.
Cum Animadversionibus
Antonii Le Grand
Londini. Impensis G. Wells & A. Swalle. Bibliopolarum Londinensium. 1682
Dedicatory letter
Clarissimo Expertissimoque Viro
THOMÆ SHORT,
Medicinæ Doctori Collegii Medicorum Londini Socio, &c.
QUOD huic Tractatui Physico manum addiderim, Vir Clarissime, effecerimque ut nunc in lucem emendatior prodiret, non tam meæ curæ, quàm Aliorum Sedulitati acceptum feras, velim. Nonnulli enim Bono publico sedulò intenti, & quibus Studiorum propago cordi est, haud pati valuere, ut tam illustre Opus, tantique Authoris Lucubrationes diutius deformes exponerentur, ac toto propemodum corpore corruptæ manerent (An id Typographi incuria, an vero Translatoris vitio/ factum sit, animus expiscari non est) Quare ab iis pluries rogatus quatenus labefactatum Opus refarcirem, aptiorique Latinitate donarem, eorum voti lubens annui, & ut Affectum etiam testarer, Animadversionibus quibusdam auxi, quatenus non purgatius modò, sed & locupletius appareret.